Alcuentru Internacional de Poesía
esthergarcia (10 de Junio, 2010)
“Poetas del Mundo” ta formáu por 6.400 poetes con embaxada cultural en 115 países, en 35 idiomes, nos cinco continentes y con una repercusión mediática de más d’un millón de visites mensuales na so páxina web: www.poetasdelmundo.com
Güei, dempués de pasar unos momentos de gracia escuchando y recitando poemes de Miguel Hernández, enfótome dende Alicante n’escribir estes ringleres. Emocionada de poder sentir los versos del Poeta, recitaos por poetes de distintos puntos del planeta. Más de cien poetes xuntámonos nesti “Alcuentru Internacional de Poesía” organizáu pol movimientu “Poetas del Mundo”, Anuesca y la Universidá d’Alicante, como Homenaxe a Miguel Hernández nel centenariu del so nacimientu. “Poetas del Mundo” ta integráu por poetes de 115 países, uníos pol compromisu colos más fondos valores humanísticos a traviés de la palabra y del versu, col envís d’algamar un mundu meyor. Nesti alcuentru poéticu, los poetes del mundu ergueremos de nuevo la bandera de la llibertá en memoria del poeta d’Orihuela.
Ayeri, na presentación d’esti alcuentru, lleyóse un manifiestu de los poetes participantes, del que reproduzo un resume:
“La humanidá vive tiempos decisivos pa la so supervivencia”
“L’home nel so afán de medrar y medrar, a costa de lo que seya, foi deteriorando’l planeta, hasta llevalu a estremos que ponen en peligru la posibilidá de siguir esistiendo como especie”.
Ye asina como esbarrumbamos La Tierra a ritmu frenéticu, col usu abusivu de recursos naturales y humanos, construyendo armes de destrucción masiva, que son quien a desaniciar la humanidá nunes hores.
Pero non too ye negativo, porque metíos nesta situación caótica de crisis económica, crisis d’idees, crisis moral y crisis de valores, podríemos abrir una ventana pensando que “son manifestaciones del partu de la historia”. Cuando la muyer allumbra un neñu: muerre una etapa y surde un nuevu amanecer”
Por esti nuevu amanecer apostamos los poetes que nestos cinco díes homenaxearemos, al Poeta que cantó como naide a la llibertá, al amor y a la paz. Los “poetes del mundu” emprendemos, adulces, un camín que nos lleve a construyir un mundu meyor de la mano de la poesía. Un camín de protesta pola falta de xusticia social, de la que tamos güérfanos nesta dómina, onde reina la violencia y la falta d’empatía. Los poetes apostamos pola construcción d’un mundu nuevu. Tenemos fame d’amor y de comprensión, tenemos sede de felicidá, y esta sede namás la mata la fonte del corazón.
Agradezo a la organización que m’invitara a participar nesti eventu tan arriquecedor, onde pasaré estos díes envuelta en poesía y cola prestosa compañía de collacios de tol mundu. Compartimos poesía poetes de Perú, Ecuador, Argentina, Egipto, Suecia, Cuba, Patagonia, República Dominicana, Ecuador, México, Colombia, Francia, Grecia, Madrid, Pontevedra, Orense, Asturias, Cartagena, Algeciras, Barcelona, Málaga, Canarias y Alicante, ente otros.
Y termino con unes palabres del manifiestu que pa mi son importantes:
“Pa ser poeta del mundu, hai que tar dispuestu a perfeicionase siempre, a aceutar la diversidá y la pluralidá nel más ampliu sentíu de la palabra. La pluralidá de llingües y cultures, como aceutamos la complexidá de la esistencia. Somos amantes del amor, lluchadores, modernos, abiertos, universales y sobre too militantes del bien”.
